Sekretari amerikan i shtetit, Antony Blinken, e përshëndeti pajtimin e izraelit me një pauzë humanitare në ofensivën e tij në Gaza, megjithatë shtoi se akoma më shumë duhet bërë për mbrojtjen e jetëve të pafajshme. Shumë palestinezë janë vrarë. Shumë kanë vuajtur javët e fundit, dhe ne duam të bëjmë gjithçka që është e mundur për të parandaluar dëmtimin e tyre, dhe për të rritur ndihmën që u jepet. Unë mendoj se është bërë njëfarë progresi. Por unë, gjithashtu, isha shumë i qartë se duhet bërë më shumë për të mbrojtur civilët dhe për dhënien e ndihmës humanitare për ta. Administrata e presidentit amerikan, Joe Biden pohoi më herët ka siguruar një rrugë të dytë kalimi për civilët që i largohen luftimeve. Hapa të tillë, tha Blinken nga ndalesa në Nju Delhi, do të shpëtojnë jetë dhe do të mundësojnë më shumë ndihmë për të arritur te palestinezët në nevojë. Vizita e kryediplomatit amerikan në Indi është ndalesa e fundit e një udhëtimi maratonë, në të cilin u përfshinë edhe Koreja e Jugut dhe një takim i ministrave të jashtëm të G7-ës në botë në Japoni, ku gjithashtu synoi të gjente një gjuhë të përbashkët për konfliktin Izrael-Hamas.