Seanca plenare e së enjtes është anuluar. Vendimin e komunikoi nëpërmjet një shkrese kryetarja e parlamentit, Elisa Spiropali. “Seanca plenare e Kuvendit të Shqipërisë, e planifikuar për ditën e enjte, datë 10 tetor, është anuluar dhe do të zhvillohet në datën 17 tetor, me rend dite të përbashkët, sipas kalendarit të punimeve të Kuvendit”, thuhet në njoftimin zyrtar. Opozita kishte njoftuar përplasje edhe të enjten, madje me të njëjtin skenar si në dy seancat e fundit plenare. Kryetari i grupit parlamentar, Gazment Bardhi deklaroi mesditën e së mërkurës se opozita do të merrte pjesë në parlament me të gjithë deputetët, përfshi edhe ata që janë përjashtuar për shkak të incidenteve të ditëve të fundit. Kujtojmë se të enjten pritet të mbërrijë në Shqipëri presidenti turk, Recepp Taypp Erdogan , i cili do të zhvillojë një vizitë zyrtare në Tiranë. Në këtë kuadër, Policia e Shtetit njoftoi qytetarët se do të ketë bllokime të disa segmenteve rrugore. Drejtuesit e automjeteve të shfrytëzojnë autostradën e re Kashar – Rinas, për të qarkulluar në drejtim të aeroportit të Rinasit, pasi aksi i vjetër Kashar – Rinas nga ora 10:00 deri në 11:30, si dhe nga ora 17:00, deri në orën 18:00, do të jetë i bllokuar. Rrugë të tjera që do të bllokohen janë: Nga Rinasi – Qafa e Kasharit – nënkalimi te ish-sheshi “Shqiponja”, Unaza (Astir) – Rrethrrotullimi i Saukut, Rruga e Elbasanit. Po ashtu të bllokuara do të jenë edhe Bulevardi “Dëshmorët e Kombit”, nga Ura te ish Hotel Dajtit deri te sheshi “Nënë Tereza”, rruga “Ismail Qemali”, rruga “Papa Gjon Pali II”, rruga “Ibrahim Rugova”, rruga “Ukraina e Lirë”, bulevardi “Zhan D’Ark” dhe rruga “Xhorxh Bush”.