Anuela Ristani jep dorëheqjen si nënkryetare e Bashkisë së Tiranës dhe largohet nga ky institucion, pak ditë pasi kryebashkiaku Erion Veliaj firmosi nga qelia e paraburgimit shkarkimin e saj si kryetare e deleguar e bashkisë. “Koha është gjykatësi më i drejtë”, thekson Ristani në postimin e saj në rrjetet sociale, ku njofton largimin nga bashkia. “Pas më shumë se një dekade në shërbim të qytetit më të bukur në botë, largohem sot me krenari, përulësi dhe plot dashuri për Tiranën. Atë që të gjithë e lakmojnë, shumë e duan, por pak e kuptojnë. Koha është gjykatësi më i drejtë, më i paanshëm dhe më i pakapshëm. Në respekt të kohës, asaj që do të vijë, lipset që qytetin ta shohim pak më tonin e ta duam për atë që jemi, jo për atë që mund të na bëjë. Dhe sa për mua, unë do të mbetem gjithmonë “xhomllikse” edhe pse kam lindur në Tiranë të Re dhe jam rritur përtej oqeanit”. Nga ana tjetër, Partia Demokratike ka kërkuar një mbledhje urgjente të Këshillit Bashkiak të Tiranës pas shkarkimit të Anuela Ristanit si kryetare e deleguar e bashkisë nga kryebashkiaku Erion Veliaj. Këshilltarët e djathtë i janë drejtuar me një shkresë zyrtare kryetares së Këshillit Bashkiak, Megi Fino, ku i kërkojnë sqarime mbi drejtimin e bashkisë. Ata kërkojnë të bëhet publike shkresa e shkarkimit, të përcaktohet kush e drejton aktualisht bashkinë dhe kush ka autoritetin për të firmosur kontrata, marrëveshje financiare dhe akte administrative. Këshilltarët opozitarë kërkojnë gjithashtu sqarime nëse firma e Erion Veliajt njihet ende si vullnet legjitim vendimmarrës.