Gjashtë vjet pas Brexit-it, Gjermania dhe Britania e Madhe po i afrohen sërish njëra-tjetrës në aspektin ekonomik. Samiti i mbajtur së fundi në Berlin dëshmoi qartë dëshirën e të dyja palëve për një bashkëpunim më të ngushtë dhe më të strukturuar ekonomik. Ministrja gjermane e Ekonomisë, Katherina Reiche, deklaroi se marrëdhëniet tregtare mes dy vendeve janë stabilizuar dhe Britania e Madhe është sot sërish në mesin e dhjetë partnerëve kryesorë tregtarë të Gjermanisë. Sipas saj, vëllimi i tregtisë arriti rreth 118 miliardë euro në vitin 2025, me Gjermaninë që eksportoi mallra në vlerë 80 miliardë euro dhe importoi rreth 33 miliardë euro nga Britania. Zhvillimet globale dhe krizat e fundit kanë treguar se ekonomia botërore nuk mund të funksionojë më “me autopilot”, deklaroi ajo, teksa kërkoi më shumë koordinim dhe siguri në zinxhirin e furnizimeve. Nga ana tjetër, ministri britanik i Ekonomisë, Peter Kyle, e cilësoi këtë moment si një mundësi unike për të rindërtuar marrëdhëniet ekonomike mes dy vendeve. Në këtë kuadër, është arritur edhe një marrëveshje për bashkëpunim në sigurimin e metaleve të rralla. Pas largimit nga Bashkimi Evropian në vitin 2020, Britania e Madhe nuk është më pjesë e kuadrit të përbashkët evropian, ndaj të dy vendet po kërkojnë forma të reja bashkëpunimi për të ruajtur dhe zhvilluar marrëdhëniet e tyre ekonomike.