Kremlini reagoi pas lajmeve se Britania do t`i japë Kievit informacionin e nevojshëm për prodhimin e raketave me rreze të gjatë veprimi SCALP, duke deklaruar se me këtë veprim, Londra po rrezikon paqen dhe kërcënoi se do të shkatërronte fabrikat që i prodhojnë ato. Paralajmërimi erdhi ndërsa kryeministri britanik Andy Burnham u zotua, gjatë një vizite në Kiev, të vazhdonte mbështetjen ushtarake për Ukrainën. I pyetur për planet e prodhimit të SCALP, zëdhënësi i Kremlinit, Dmitry Peskov nuk e fshehu zemërimin. Britania po i hedh rregullisht benzinë zjarrit dhe po harton në mënyrë sistematike e të vazhdueshme skema për të penguar edhe përparimin më të vogël në procesin e paqes. Forcat tona të armatosura po veprojnë në përputhje me rrethanat, duke mbledhur informacionin përkatës për të identifikuar vendet ku prodhohen raketa të tilla dhe pajisje të tjera ushtarake, dhe duke marrë masa për shkatërrimin e këtyre objekteve. Raketa SCALP është një raketë lundruese me rreze të gjatë veprimi, e aftë të godasë objektiva në një distancë prej rreth 250 kilometrash. Franca dhe Britania e kanë furnizuar me armë të tilla Ukrainën që nga fillimi i ofensivës së plotë të Rusisë në vitin 2022, por Kievi ende nuk i ka prodhuar ato në vend.