Gjykata e Posaçme ka vendosur arrest me burg për Sokol Idrizajn, ish-shoferin e Ardi Veliut dhe bashkëshortes së tij Elda Idrizaj, pasi dyshohen si anëtarë të një grupi kriminal. Masa e arrestit i është komunikuar edhe anëtarëve të tjerë të dyshuar të këtij grupi: Dy vajzave të Sokol Idrizajt, njëra prej tyre në arrest shtëpie dhe tjetra në detyrim paraqitje. Është lënë në burg Vangjush Kashari biznesmen në shitjen e sendeve me vlere si dhe Agustin Mesuli, Altin Doda e Florjan Bakri. Gjykata e Posacme ka vendosur masën arrest me burg për Tomor Baruti Gentian Aga dhe Aldi Shehi burg, ndërsa është lënë në detyrim paraqitje Dejvi Skenderi. Këta shtetas dyshohet se kanë transportuar sende të vjedhura dhe me vlerë të çmuar nga shteti francez drejt Shqipërisë, ku janë shitur në mënyrë të fshehtë dhe kontrabandë përmes argjendarisë së shtetasit Vangjush Kashari që ka dyqanin qendror në Tiranë. Në mënyrë paralele edhe në Francë është zhvilluar ky operacion, ku janë arrestuar dy persona që dyshohet se janë pjesë të këtij grupi. Shumica e të dyshuarve janë anëtarë të një kompanie transporti ndërsa katër prej tyre ende nuk janë arrestuar dhe janë në kërkim. Hetimet për grupin nisën në vitin 2019 kur autoritetet franceze referuan informacion konfidenciale palës shqiptare që një grup po bastiste banesa e merrte sende me vlerë, të cilat përmes një kompanie futeshin në portin e Durrësit ku dyshohet se ishin implikuar edhe punonjës të policisë së shtetit.