Diplomatja portugeze, Sofia Moreira de Sousa, është propozuar për ambasadore të Delegacionit të Bashkimit Evropian në Shqipëri. Përfaqësuesja e Lartë e BE për Punët e Jashtme dhe Politikën e Sigurisë, Kaja Kallas, ka propozuar emërimin e portugezes si ambasadore të re të unionit në vendin tonë. Sofia Moreira de Sousa aktualisht mban detyrën e Shefes së Përfaqësisë së Komisionit Europian në Portugali. Gjatë karrierës së saj diplomatike, ajo ka mbajtur një sërë pozicionesh të rëndësishme në institucionet europiane, përfshirë edhe postin e ambasadores së Bashkimit Europian në Kepin e Gjelbër. Diplomatja portugeze do të zëvendësoje italianin Silvio Gonzato, i cili pritet të largohet në fund të verës, me përfundimin e mandatit të tij si ambasador në Shqipëri. Në njoftimin e publikuar në faqen zyrtare të unionit, thuhet se shefja e diplomacisë, Kallas, ka propozuar në total emërimin e 33 ambasadorëve të Bashkimit Evropian dhe 7 zëvendësshefave të delegacioneve të unionit. 145 delegacionet e BE-së janë fytyra e Bashkimit Evropian në mbarë botën dhe përbëjnë vijën e parë të mbrojtjes së interesave të unionit jashtë kufijve të saj. Ato informojnë, zbatojnë dhe promovojnë prioritetet e Bashkimit Evropian, si dhe politikën e tij të jashtme dhe të sigurisë. Emërimet e ambasadorëve të BE-së do të formalizohen pasi të merret miratimi zyrtar nga vendet pritëse përkatëse, aty ku është e nevojshme, si dhe pas përfundimit të procedurave të tjera administrative në kuadër të procesit të rotacionit për vitin 2026.