Udhëheqësi çeçen, Ramzan Kadyrov ka akuzuar ligjvënësit rusë nga rajonet fqinje për përpjekje për të organizuar vrasjen e tij, dhe i kërcënoi ata me “gjakmarrje" nëse nuk e provojnë të kundërtën, njoftoi agjencia shtetërore e lajmeve TASS. Kadyrov, një aleat i ngushtë i presidentit rus Vladimir Putin, e ka bërë deklaratën në një takim të zyrtarëve çeçenë të sigurisë. Video e takimit u publikua në kanalin personal Telegram të Kadyrov. "Po ju them se ka dëshmitarë për njerëzit të cilët u përpoqën të porosisnin ekzekutimin ", citohet të ketë deklaruar Kadyrov. Kadyrov raportohet të ketë përmendur tre anëtarë të parlamentit rus, dy nga Dagestani dhe një nga Ingushetia për komplotin e pretenduar. “Nëse nuk vërtetojnë të kundërtën, unë do të shpall zyrtarisht gjakmarrje”, citohet të ketë thënë ai. Çeçenia kufizohet me Dagestanin dhe Ingushetinë. Një ish-luftëtar çeçen që luftoi për pavarësi kundër forcave ruse gjatë përpjekjes së rajonit kryesisht mysliman për t'u shkëputur në vitet 1990, Kadyrovi kaloi përfundimisht në anën e Moskës. Ai është bërë lider i Çeçenisë në vitin 2007, tre vite pas vrasjes së babait të tij. Putini i ka dhënë Kadyrovit liri për ta drejtuar Çeçeninë në këmbim të ruajtjes së stabilitetit në rajon. Ai është bërë një lojtar i rëndësishëm në politikë dhe ushtri, duke përfshirë sigurimin e ushtarëve për të ndihmuar përpjekjet luftarake të Rusisë në Ukrainë.