Shtetet e Bashkuara që përballen me presionin për të miratuar ndihmën ushtarake për Ukrainën, Izraelin dhe Tajvanin kanë filluar të shfaqin problemet e para me prodhimin e armëve. Sipas ekspertes për gadishmërinë ushtarake në Institutin Enterprise, Mackenzie Eaglen, të cilën citon Zëri i Amerikës edhe industria e mbrojtjes amerikane gjithashtu ka nevojë të madhe për mbështetje. Mbështetja e Amerikës për ushtritë e Ukrainës dhe Izraelit ka rritur kërkesat në industrinë amerikane të mbrojtjes, tha ajo duke shtuar se fabrikat në të gjithë vendin kanë prodhuar armë dhe municione me një ritëm të paparë në dekada. Megjithatë, ekspertja paralajmëron se kjo industri nuk po mundet të mbajë ritmin para kërcënimeve komplekse, duke filluar nga agresioni rus në Evropën Lindore, te sulmet e militantëve që kanë mbështetjen e Iranit në Detin e Kuq. “Marina po përdor më shumë raketa 'Tomahaëk' brenda një jave se sa ka blerë gjatë gjithë vitit të kaluar. Kjo ka të bëjë me normat e prodhimit në kohë paqeje që duhet të ndryshohet përmes përkrahjes shtesë për sigurinë kombëtare”, sqaron ekspertja Eaglen. Në këtë pikë një vëzhguese e mënyrës se si Shtetet e bashkuara të Amerikës reagojnë, është Kina, tha ekspertja Eaglen duke shtuar se, “Pekini e di se sa raketa po blejmë apo prodhojmë në vit dhe sigurisht ato që kemi nuk mjaftojnë për të parandaluar një luftë në Azi”, shtoi ajo duke përmendur se nëse Kina pushton Tajvanin, sic ka paralajmëruar tronditet gjithë rajoni i Paqësorit. Ekspertja Mackenzie Eaglen apeloi që senati të miratojë sa më parë një projektligj për sigurinë kombëtare që financon dërgimin e më shumë nëndetëseve amerikane për një patrullim më të mirë të Paqësorit. Pamjet: AFP