Autoritetet në Kosovë po monitorojnë nga afër gjendjen shëndetësore të qytetarëve që mbetën të lënduar nga zjarri, që përfshiu hotelin në Vlorë, në orët e para të së dielës. Kryeministri Alvin Kurti iu uroi shërim të shpejtë të gjithë qytetarëve të lënduar, ndërsa njoftoi se autoritetet janë në komunikim me institucionet shqiptare. “Sot, në orët e hershme të mëngjesit, një zjarr përfshiu një hotel në Vlorë, ku si pasojë u lënduan katër shtetas të Republikës së Kosovës, tre prej të cilëve po marrin trajtim spitalor në Tiranë dhe një në Vlorë. Jemi të tronditur nga lajmi dhe po e monitorojmë nga afër gjendjen e qytetarëve tanë, duke qenë në komunikim të vazhdueshëm me autoritetet përkatëse në Shqipëri. Të lënduarve u dëshiroj shërim të shpejtë dhe të plotë”. Nga zjarri që përfshiu hotelin në zonën e Lungomares mbetën të lënduar gjashtë pushues. Pesë të plagosur u transportuan për mjekim në Tiranë, ndërsa një vajzë ndodhet në gjendje të rëndë, me djegie në pjesën më të madhe të trupit. Disa prej pushuesve u detyruan të hidhen nga ballkonet për t'i shpëtuar flakëve dhe tymit.