Bullgaria ka zbuluar në territorin e saj një dron që mbante një pajisje shpërthyese. Alarmi është dhënë nga Ministria e Mbrojtjes e Bullgarisë e cila tha se të hënën dërgoi një njësi speciale për të shkatërruar dronin, i cili u gjet gjatë natës në qytetin verior të Tyulenovo në bregun e Detit të Zi. Qyteti Tyulenovo është rreth 30 kilometra nga kufiri jugor i Rumanisë dhe qindra kilometra nga portet e lumit Danub të Ukrainës, të cilat Rusia i ka bombarduar me raketa dhe dronë gjatë verës. Ministria bullgare e mbrojtjes tha se një ekip prej pesë anëtarësh nga baza detare e Varnës u dërgua pas një kërkese nga guvernatori rajonal dhe shefi i mbrojtjes. Sipas mediave bullgare, qytetarët e kanë gjetur dronin mbrëmjen e së dielës. Hetuesit zbuluan se në mbetjet e dronit ishin bashkangjitur municion 82 milimetrash me sasi të madhe skzplozivi. Zëvendësministri bullgar i Mbrojtjes, Yordan Bozhilov tha se është e vështirë të përcaktohet origjina e dronit dhe nëse i përket Rusisë apo Ukrainës. Në fillim të këtij muaji, Rumania raportoi se kishte gjetur mbetje nga një dron rus në territorin e saj, pranë kufirit me Ukrainën. Si anëtarë të NATO-s, Bullgaria dhe Rumania mbrohen sipas nenit 5 të traktateve të aleancës ushtarake, i cili thotë se një sulm ndaj një anëtari do të konsiderohet si sulm ndaj të gjithë anëtarëve. Pamjet: AFP