Organizata Botërore e Shëndetësisë po koordinon operacionin e evakuimit të pasagjerëve të anijes MV Hondius, pas shpërthimit të hantavirusit që ka shkaktuar tre viktima. Në ishullin Tenerife pritet të mbërrijë kreu i OBSH-së për të mbikëqyrur masat e kontrollit shëndetësor, ndërsa autoritetet konfirmojnë se virusi Andes, i vetmi lloj që transmetohet nga njeriu te njeriu, është zbuluar tek disa pasagjerë. Megjithatë, OBSH thekson se rreziku për publikun mbetet i ulët. Shefi i World Health Organization pritet të mbërrijë të sot në ishullin spanjoll Tenerife për të ndihmuar në koordinimin e evakuimit të pasagjerëve të prekur nga hantavirusi, thanë burime të ministrisë spanjolle. Ai do të shoqërojë ministrat spanjollë të Shëndetësisë dhe Brendshëm në një qendër operative “për të siguruar koordinimin mes administratave, kontrollin shëndetësor dhe zbatimin e protokolleve të planifikuara të monitorimit dhe reagimit”, thanë burimet. Tre pasagjerë të anijes MV Hondius një çift holandez dhe një grua gjermane humbwn jetën, ndërsa të tjerë janë sëmurur nga kjo sëmundje e rrallë, e cila zakonisht përhapet tek brejtësit. Lloji i vetëm i hantavirusit që mund të transmetohet nga njeriu te njeriu, virusi Andes, është konfirmuar tek personat që kanë rezultuar pozitivë, duke shtuar shqetësimin ndërkombëtar. Anija me flamur holandez, me rreth 150 persona në bord, pritet të mbërrijë të dielën në ishullin spanjoll Tenerife. Më pas, fluturime speciale do t’i transportojnë pasagjerët drejt vendeve të tyre. Më herët të premten, OBSH deklaroi se shpërthimi i hantavirusit paraqet rrezik minimal për publikun e gjerë. “Ky është një virus i rrezikshëm, por vetëm për personin që është realisht i infektuar, dhe rreziku për popullatën mbetet absolutisht i ulët”, tha zëdhënësi i OBSH-së, Christian Lindmeier. Ai shtoi se nga situata në MV Hondius rezulton se “edhe personat që kanë ndarë kabinën nuk janë infektuar domosdoshmërisht të dy”, kur njëri prej tyre ka shfaqur simptoma. “Virusi nuk është aq ngjitës sa të kalojë lehtësisht nga personi te personi”, deklaroi ai. OBSH tha të premten se deri tani janë konfirmuar gjashtë raste nga tetë të dyshuara. Në anije nuk ka më raste të dyshuara.