Një person ka humbur jetën dhe më shumë se 200 të tjerë janë sëmurë gjatë një shpërthimi të salmonelës në të gjithë Mbretërinë e Bashkuar, të cilin autoritetet shëndetësore e kanë lidhur me konsumimin e vezëve të importuara, shkruan The Guardian. Mosha e 207 personave të prekur varion nga foshnje deri në 90 vjeç, sipas Agjencisë së Sigurisë Shëndetësore të Mbretërisë së Bashkuar (UKHSA), e cila po drejton hetimin mbi këtë shpërthim. Agjencia po bashkëpunon me vende të tjera evropiane, përmes sistemit të tyre të përbashkët të mbikëqyrjes së kërcënimeve ndaj shëndetit, për të përcaktuar se si nisi shpërthimi. Agjencia bëri të ditur se nuk mund të japë detaje rreth personit që humbi jetën apo rrethanave të vdekjes së tij, pasi çështja është objekt i një hetimi në vazhdim. Raportohet se të paktën 34 persona u sëmurën aq rëndë nga salmoneloza – sëmundja e shkaktuar nga salmonela, saqë u desh të trajtoheshin në spital, ndërsa dy prej tyre pësuan infeksion në qarkullimin e gjakut. Autoritetet kanë konstatuar se të 207 rastet lidhen me një lloj të vetëm të salmonelës. Pjesa më e madhe e rasteve janë regjistruar në Angli (199), gjashtë në Skoci dhe nga një rast në Uells dhe në Irlandën Veriore.