Autoritetet franceze kanë vendosur ndalimin e përkohshëm të konsumimit të alkoolit në vende publike dhe kufizimin e shitjes së tij për ta marrë me vete në Paris, si pjesë e masave për të lehtësuar presionin mbi spitalet gjatë valës ekstreme të të nxehtit që po godet Evropën. Sipas autoriteteve, qytetarëve do t’u ndalohet konsumimi i alkoolit në hapësirat publike nga mesi i ditës së premte deri në orën 07:00 të së shtunës, si dhe gjatë të njëjtit interval nga e shtuna në të diel. Ndërkohë, shitja e alkoolit për ta marrë me vete do të ndalohet nga ora 18:00 deri në 07:00, ndërsa baret dhe restorantet me licencë do të vazhdojnë aktivitetin normal. Masat u morën pasi vala e të nxehtit ka shkaktuar mbingarkesë në sistemin shëndetësor. Autoritetet raportojnë se shërbimi i ambulancës në Paris ka regjistruar katër herë më shumë raste të arrestit kardiak se zakonisht gjatë një periudhe 24-orëshe. Zyrtarët paralajmërojnë se rreziku nuk kufizohet vetëm te të moshuarit, por prek edhe të rinjtë. Një grua vendos një shishe të mbushur me akull në kokë për t'u freskuar në Sheshin e Shën Pjetrit në Vatikan Kryeministri francez njoftoi ngritjen e nivelit të alarmit shëndetësor në shkallën më të lartë për të rritur kapacitetet e spitaleve dhe për të mbrojtur grupet më të rrezikuara. Ndërkohë, autoritetet lokale u kanë bërë thirrje qytetarëve të shmangin aktivitetet fizike në orët e pikut të temperaturave. Vala e të nxehtit pritet të zhvendoset drejt Evropës Qendrore dhe Lindore. Në Gjermani parashikohen temperatura deri në 40 gradë Celsius, ndërsa Republika Çeke ka shpallur paralajmërim për mot ekstrem. Edhe Italia pritet të përballet me temperatura mbi 40 gradë Celsius në ditët në vijim. Imazhet e Bashkimit Evropian, Copernicus Sentinel-3 Satelitët Copernicus Sentinel-3 të marra më 23 qershor 2026 në orën 09:54 UTC tregojnë temperaturat e sipërfaqes së tokës (LST) në të gjithë Francën qendrore dhe jugore, si dhe Spanjën veriore. Shefi i Kombeve të Bashkuara për ndryshimet klimatike, Simon Stiell, deklaroi se kjo valë e të nxehtit është një tjetër dëshmi e ndikimit të krizës klimatike dhe bëri thirrje për përshpejtimin e kalimit drejt burimeve të rinovueshme të energjisë, mbrojtjen e pyjeve dhe forcimin e masave për përshtatjen ndaj ndryshimeve klimatike.