Disa automjete të Forcës së Sigurisë së Kosovës hynë sot në veriun me shumicë serbe të vendit, por përpara se situata të merrte ngjyrimë shqetësuese, vetë FSK e pranoi shpejt se në fakt, gjithcka kishte qenë thjesht një gabim. Drejtues të saj njoftuan se automjetet kishin ngatërruar drejtimin gjatë lëvizjes nga Istogu drejt kazermës së FSK-së në Mitrovicë. “Forca e Sigurisë së Kosovës njofton publikun që këtë mëngjes, në orën 10 e 30, gjatë lëvizjes së autokolonës së FSK-së drejt Mitrovicës, pjetarët e saj kanë ngatërruar drejtimin e lëvizjes”, thuhet në deklaratën për shtyp. Zëvendësdrejtori i Policisë së Kosovës për rajonin e veriut, Veton Elshani sqaroi se ata kanë gabuar vendndodhjen duke menduar se në fakt, ndodheshin në Mitrovicën e Jugut. Korrikun e këtij viti, FSK-ja hyri në veri për një operacion kërkim-shpëtimi në Liqenin e Ujmanit, ku ishte zhdukur një emigrant që ishte hedhur nga ura. Dhjetorin e vitit të kaluar, kryeministri në detyrë i Kosovës, Albin Kurti qe shprehur se me zotimin e ish-kreut të ekzekutivit Hashim Thaçi, për të mos e dërguar FSK-në në veri të vendit pa lejen e KFOR-it, ishin krijuar kufij të brendshëm. Kurti i kishte cilësuare zhvillimet e atëhershme si një “skandal”dhe kishte dalë me pretendimin se një lëvizje e tille inkurajonte “elementet kriminalë për ndarjen e Kosovës.