Rikthehen tensionet në Lindjen e Mesme, duke vënë në rrezik armëpushimin mes Uashingtonit dhe Teheranit. Shtetet e Bashkuara të Amerikës sulmuan shtatë anije iraniane në Ngushticën e Hormuzit, pasi Irani sulmoi me raketa një ndër objektet kryesore të eksportit të naftës në Emiratet e Bashkuara Arabe, duke plagosur tre persona. Autoritetet në Emiratet e Bashkuara e cilësuan sulmin e Teheranit si një përshkallëzim të rrezikshëm të situatës, ndërsa njoftuan se tre prej raketave iraniane u shkatërruan mbi ujërat territoriale dhe një tjetër ra në det. Pas sulmeve të fundit nga Irani, shkollat në Emiratet e Bashkuara Arabe mbyllën dyert, duke kaluar mësimin online të paktën deri të premten. Ministria e Arsimit e Emirateve të Bashkuara Arabe tha në një deklaratë se shkollat dhe çerdhet publike e private do të operojnë në distancë nga e marta deri të premten "nga shqetësimi për sigurinë e nxënësve dhe të gjithë atyre që punojnë në sektorin e arsimit. Situata aktuale do të rivlerësohet të premten, më 8 maj 2026, nëse nuk do të ketë nevojë për zgjatjen e periudhës", thuhej në njoftim.