Dy persona kanë humbur jetën dhe një tjetër rezulton i zhdukur pas reshjeve të dendura dhe përmbytjeve që kanë përfshirë rajonin e Katalonjës në Spanjë. Autoritetet lokale kanë konfirmuar viktimat, ndërsa ekipet e emergjencës vijojnë operacionet e kërkim-shpëtimit në zonat më të prekura. Udhëheqësi i Katalonjës, Salvador Illa, konfirmoi vdekjen e një burri në Tordera, në veri të Barcelonës, pasi një mur u shemb si pasojë e motit të keq. Viktima e dytë është regjistruar në komunën e Montornès del Vallès. Ndërkohë, ekipet e emergjencës po kërkojnë një person të zhdukur në Pineda de Mar, rreth 52 kilometra në veri të Barcelonës. Reshjet intensive kanë shkaktuar përmbytje në disa zona, duke bllokuar rrugë dhe duke marrë me vete automjete. Autoritetet kanë aktivizuar shërbimet e emergjencës dhe u kanë bërë thirrje qytetarëve të tregojnë kujdes dhe të shmangin zonat e përmbytura. Përmbytje edhe në pjesë të tjera të Spanjës Moti ekstrem ka shkaktuar probleme edhe në pjesë të tjera të vendit. Në Madrigueras, në Spanjën qendrore, reshjet shumë intensive brenda një periudhe të shkurtër shkaktuan përmbytje të mëdha. Një grua 102-vjeçare humbi jetën pasi uji përmbyti banesën e saj në katin përdhes, ndërsa ekipet e emergjencës shpëtuan rreth 90 persona. Autoritetet spanjolle vijojnë monitorimin e situatës, ndërsa ekipet e shpëtimit vazhdojnë kërkimet për personin e zhdukur në Katalonjë.