Rusia ka kryer sulme të mëdha ajrore kundër objekteve energjetike të Ukrainës, duke i përdorur dhjetëra raketa lundruese dhe dronë. Presidenti ukrainas, Volodymyr Zelensky, i ka quajtur sulmet “akt terrorizmi”. Rajoni perëndimor Ternopil raportoi “pasoja negative” nga sulmet ruse, pa dhënë më shumë detaje. Në rajonin e Lvivit, i cili ndodhet në perëndim të vendit, Rusia i sulmoi objektet energjetike. Shpërthime të shumta u raportuan në qytetin jugor të Odesës, ndërsa autoritetet në Kiev thanë se sistemet kundërajrore janë duke vepruar. Po ashtu shpërthime u raportua edhe në tre qytete të tjera. Zelensky tha se sulmi tregoi se presidenti rus, Vladimir Putin, “nuk do të ndalet nga fjalët boshe. Rusia i lëshoi 93 raketa, duke përfshirë të paktën një raketë të Koresë së Veriut, 81 prej të cilave u rrëzuan. Përveç kësaj, rreth 200 dronë u përdorën gjithashtu në këto sulme, tha ai. Operatori kombëtar i rrjetit elektrik të Ukrainës, raportoi më herët se sulmet ruse e detyruan atë vendosë reduktime në furnizimin me energji elektrike në të gjithë vendin. Këto sulme u kryen në një kohë kur përpjekjet diplomatike për t’i dhënë fund luftës më të madhe në Evropë ndër dekada po rriten. “Ky është ‘plani i paqes’ i Putinit: të shkatërrojë gjithçka. Kështu dëshiron ai të “negociojë” – duke i terrorizuar miliona njerëz”, tha Zelensky pas sulmeve ruse.