Top Channel/Aksidenti tragjik me 4 viktima,reagon Policia e Shtetit:Po e hetojmë me kujdes maksimal!

Zëvendësdrejtori i Përgjithshëm i Policisë së Shtetit, Albert Dervishaj, ka reaguar pas aksidentit tragjik ku u shua një familje me katër anëtarë dhe mbetën të plagosur katër persona të tjerë. Teksa i ka shprehur ngushëllimet familjarëve, Dervishaj thotë se ndjen keqardhje për faktin se pavarësisht prezencës së shtuar të Policisë Rrugore në të gjitha akset kryesore të vendit, sidomos tani gjatë sezonit të verës, ndonjëherë nuk mundet të parandalohen tragjedi të tilla. Po ashtu Dervishaj siguroi të gjithë familjarët dhe të afërmit, si dhe opinionin publik, se aksidenti i sotëm po hetohet me kujdesin maksimal për të nxjerrë të gjitha përgjegjësitë në këtë rast tragjik, ndërsa i ka bërë thirrje të gjithë qytetarëve që të ecin me kujdes.