Administrata e Presidentit Donald Trump pushoi nga puna disa qindra punonjës të Administratës Federale të Aviacionit, në një fundjavë të ngarkuar me udhëtime ajrore. Pushimet nga puna ndodhin vetëm disa javë pas përplasjes vdekjeprurëse të një helikopteri ushtarak me një aeroplan pasagjerësh në fund të muajit të kaluar në Aeroportin Kombëtar të Uashingtonit, “Ronald Reagan”. Punonjësit e punësuar në dy vitet e fundit, të cilët ndodheshin në periudhë prove, u njoftuan se ishin pushuar nga puna përmes emailit, thuhej në një deklaratë të David Speros, president i sindikatës së punonjësve të sigurisë së aviacionit. Një zyrtar i Departamentit të Transportit tha për agjencinë e lajmeve ‘Associated Press’ se asnjë kontrollor i trafikut ajror nuk u prek nga shkurtimet dhe se agjencia ka "mbajtur në punë personelin që kryen funksione kritike të sigurisë". Pushimet nga puna ndodhin në një kohë kur Administrata Federale e Aviacioni po përballet me një mungesë të kontrollorëve të trafikut ajror. Zyrtarët federalë kanë shprehur shqetësimin për sistemin e mbingarkuar të trafikut ajror dhe personelin e pamjaftueshëm për vite me radhë, veçanërisht pas një numri incidentesh me avionë që fluturonin shumë afër njëri-tjetrit në aeroportet e Shteteve të Bashkuara. Ndër arsyet që ata kanë përmendur për mungesën e personelit janë pagat jo të mira, turnet e gjata, trajnimi intensiv dhe pensionimet e detyrueshme.