Një aksident i rëndë me pasojë vdekjen është regjistruar mesditën e kësaj të enjteje në aksin rrugor Lezhë-Shëngjin, në lagjen “Xhenjo”. Një automjet tip “Audi” është përplasur me një kamion dhe më pas ka goditur një mur rrethues. Si pasojë e aksidentit, ka humbur jetën drejtuesi i automjetit, Paulin Zefi, 30 vjeç, ndërsa pasagjerja që ndodhej me të ka mbetur e plagosur rëndë. Për nxjerrjen e tyre nga makina ka qenë e nevojshme ndërhyrja e forcave zjarrfikëse. Edhe drejtuesi i kamionit ka pësuar lëndime dhe po merr trajtim mjekësor në spitalin e Lezhës, por fatmirësisht ndodhet jashtë rrezikut për jetën. Sipas informacioneve paraprake, dyshohet se shkak i aksidentit ka qenë shpejtësia e lartë dhe lagështira në rrugë, të cilat mund të kenë ndikuar në humbjen e kontrollit të automjetit. Lezha mbetet një ndër qarqet me numrin më të lartë të aksidenteve rrugore, pavarësisht masave të marra nga policia për të rritur sigurinë në rrugë. Ngjarja e sotme është një tjetër tregues i rëndësisë së respektimit të rregullave të qarkullimit dhe nevojës për më shumë ndërgjegjësim nga drejtuesit e mjeteve. Policia ka nisur hetimet për zbardhjen e plotë të rrethanave të aksidentit.