Një 7-vjeçar shqiptar humbi tragjikisht jetën dhe babai i tij u plagos rëndë, pasi mjeti me të cilin udhëtonin u përplas ‘kokë më kokë’ me një makinë tjetër, në Bolonja të Italisë. Ngjarja e rëndë ndodhi në rrugën Porrettana, ku dy makinat u përplasën, teksa tentuan të shmangnin një motor. Përplasja mes dy makinave ishte shumë e fortë, duke bërë që mjeti ku ndodheshin shqiptarët të kalonte në korsinë tjetër të rrugës. I plagosur mbeti edhe drejtuesi i makinës tjetër, një 20-vjeçar italian, si dhe shoferi i motorit, një 46-vjeçar, të cilët ndodhen jashtë rrezikut për jetën. Sipas mediave italiane, fëmija ndodhej në sediljen e pasme të makinës dhe nuk mbante rrip sigurimi, duke bërë që në momentin e përplasjes së mjeteve të hidhej përpara. Ekipet e ndihmës së shpejtë mbërritën menjëherë në vendngjarje dhe tentuan ta shpëtonin, por nuk ia dolën dhe i mituri ndërroi jetë teksa po transportohej me urgjencë në spitalin e Bolonjas. Babai i fëmijës, një 34-vjeçar shqiptar, u nxor nga makina nga zjarrfikësit dhe u dërgua në spital, në gjendje të rëndë.