Një aksident është shënuar mbrëmjen e sotme në fshatin Zhym të Lushnjës, ku mjeti tip “Volkswagen Jetta” ka përfunduar në kanal. Drejtuesi i mjetit, Elnis Allkanjari, udhëtonte i vetëm nga Krutja drejt “Pushimit të Shoferit” drejt fshatit Zhymë. Makina ka dalë nga rruga si pasojë e humbjes së kontrollit, teksa fillimisht është përplasur me një shtyllë dhe më pas ka rënë në kanal. Elnis Allkanjari, rreth të 40-tave, ka mbetur i plagosur dhe është dërguar në Spitalin e Lushnjës. “Rreth orës 20:20, në fshatin Zhymë, shtetasi E. A., duke drejtuar automjetin tip “Volkswagen”, ka humbur kontrollin mbi drejtimin e automjetit dhe për pasojë automjeti ka dalë nga rruga. Si pasojë e daljes nga rruga, është dëmtuar shtetasi E.A., i cili ndodhet në spital”, njofton policia. Është dashur ndërhyrja e zjarrfikëses dhe policisë për të nxjerrë të plagosurin, i cili ndodhet nën kujdesin e mjekëve. Ndërkohë atij po i bëhet edhe testi i alkoolit, pasi dyshohet se ka qenë nën efektin e tij. Grupi hetimor po punon për zbardhjen e plotë të shkaqeve të aksidentit.