“Kam një djalë 25 vjeç dhe ai është i varur nga unë, sepse megjithëse punon, sërish duhet të kujdesem për të”, deklaroi Rajan Ruth kur doli para gjykatësit. 58-vjeçari që mund të kishte ndryshuar historinë e botës pasi tentoi të vriste Donald Trump dukej i qetë në sallën e gjyqit dhe herë pas here jepte ndonjë buzëqeshje të vakët. Në morinë e pyetjeve që iu bë nga gjyqtari, ai foli gjatë gjithë kohës me zë të ulët dhe shkurt, raporton “The Telegraph”. Ruth hyri në gjykatë pak para orës 10 të mëngjesit me tre të pandehur të tjerë. Seanca e marrjes në pyetje zgjati më pak se 1 orë dhe më pas u largua nën masa të rrepta sigurie. Ruth zbuloi se ai fitonte rreth 3,000 dollarë në muaj, kishte "zero fonde" në kursime dhe "zero" pasuri të paluajtshme. Të vetmet pasuri që ai zbuloi ishin dy kamionë, që sipas Ruth kushtojnë nga rreth 10 000 dollarë secili. Ai tha se djali i tij më i vogël, 25 vjeç, është nën kujdesin e, i cili megjithëse është i punësuar, vazhdon të mbështetet tek i ati për shkak të gjendjes në të cilën ndodhet, pa specifikuar se për çfarë bëhej fjalë saktësisht. Kur u pyet nëse kishte pasuri të tjera, ai sërish tha me zë të mekur: “Jo, nuk kam”. Akuza të tjera më serioze mund të ngrihen kundër burrit 58 vjeçar që u arrestua në lidhje me atë që FBI e përshkroi si një "tentativë e dukshme për vrasjen e ish-presidentit Trump".