Fenomeni i largimit të mjekëve të rinj nga Shqipëria dhe protestat e fundit të studentëve të mjekësisë për ligjin e ri që i detyron të punojnë në vendin e tyre deri në pesë vjet, ose derisa të paguajnë tarifat e tyre të shkollimit është trajtuar në një shkrim të gjatë nga gazetarja Briseida Mema për agjencinë franceze të lajmeve, AFP. “Si një nga vendet më të varfra të Evropës, kombi ballkanik nuk mund të konkurrojë me pagat dhe kushtet e punës në Gjermani apo Itali, ku shumë mjekë të rinj shqiptarë lëvizin për punë”, thuhet në shkrimin që e vë theksin tek vendimi më i fundit i qeverisë për të frenuar ikjen e mjekëve të rinj. “Që kur ligji ka hyrë në fuqi më 1 tetor, studentët e mjekësisë kanë kërkuar heqjen e tij. Ata kanë mbajtur protesta jashtë ministrisë së arsimit dhe Fakultetit të Mjekësisë të Universitetit të Tiranës. Ata e etiketojnë legjislacionin "jokushtetues" dhe argumentojnë se ai shkel parimet bazë të të drejtave të njeriut mbi lirinë e lëvizjes, duke i privuar atyre mundësinë për të zhvilluar trajnime jashtë vendit”, -thekson AFP-ja duke sqaruar se për çështjen pritet të vendosë tashmë gjykata Kushtetuese. Pamjet: AFP