Ministria e Infrastrukturës dhe Energjisë iu jep 30 ditë afat dy shoqërive aksionere, Mabco Constructions të Behgjet Pacollit dhe “2A Group” të Valon Ademi për të zgjidhur mosmarrëveshjet mes tyre, në mënyrë që t’i hapet rrugë rinisjes së punimeve në Aeroportin e Vlorës. Punimet në aeroport aktualisht janë pezulluar, për shkak të konflikteve mes aksionerëve, që përfunduan në dyert e gjykatave. “Ministria e Infrastrukturës dhe Energjisë kërkon formalisht, që palët të iniciojnë një proces të përbashkët për zgjidhjen e mosmarrëveshjeve mes tyre, proces i cili duhet të realizohet brenda një periudhe prej 30 ditësh nga data e këtij komunikimi”. Më tej, ministria kërkon nga dy aksionerët Pacolli e Ademi, që në fund të afatit 30-ditor, t’i drejtohen autoritetit kontraktor me gjithë dokumentacionin e kërkuar për zbatimin e kontratës. “Gjatë kësaj periudhe, palët duhet të identifikojnë zgjidhje të qëndrueshme për mosmarrëveshjet e tyre tregtare, si dhe të bëjnë të mundur që në përfundim të kësaj periudhe të dorëzojnë pranë autoritetit kontraktor të gjithë dokumentacionin e kërkuar në kuadër të komunikimeve për zbatimin e kontratës, me qëllim garantimin e vijimit të punimeve dhe përmbushjen e detyrimeve të kontratës koncesionare, ndaj shtetit shqiptar”.