Administrata Trump ka urdhëruar pezullimin e përkohshëm të takimeve për viza në ambasadat dhe konsullatat amerikane në mbarë botën. Departamenti i Shtetit thotë se oraret po ndryshohen për shkak të trajnimit të zyrtarëve konsullorë, por nuk ka dhënë një afat për rikthimin e plotë të shërbimeve. Administrata e Presidentit Donald Trump ka pezulluar përkohësisht takimet për viza për aplikantët në të gjithë botën, në një kohë kur qeveria amerikane po ashpërson politikat e emigracionit. Një zëdhënës i Departamentit amerikan të Shtetit deklaroi se në të gjitha ambasadat dhe konsullatat e SHBA-së ka nisur një program global trajnimi. Për t’i krijuar hapësirë kësaj nisme, oraret e shërbimeve konsullore do të ndryshohen. Departamenti i Shtetit nuk dha hollësi për kohëzgjatjen e trajnimit apo për afatin e pezullimit. Sipas tij, qëllimi është që zyrtarët konsullorë të vlerësojnë në mënyrë të plotë dhe të njëtrajtshme aplikantët, përfshirë mundësinë që ata të varen në të ardhmen nga ndihmat publike amerikane. Aplikantë për viza emigrimi, të cilët kishin intervista të planifikuara në ambasadat dhe konsullatat amerikane, kanë marrë njoftime se takimet e tyre do të shtyhen. Ata do të informohen më vonë për datat e reja.