4 në 5 biznese të kontrolluara gjatë vitit 2025 kanë rezultuar me shkelje të legjislacionit të punës. Raporti vjetor i vitit 2025 i Inspektoratit të Punës evidenton se 79 për qind e subjekteve të inspektuara kanë pasur problematika, duke e kthyer shkeljen në normë dhe jo përjashtim. Informaliteti vijon të mbetet kryesori. Nga kontrollet janë identifikuar 2 mijë e 591 punonjës informalë dhe afro 3 mijë raste pa kontrata pune. Raporti nënvizon se shumica u formalizuan pas ndërhyrjes së inspektoratit, por vetë shifrat tregojnë përmasën e fenomenit.