794 persona u arrestuan nga policia gjatë muajit gusht për vepra të ndryshme penale. Ata u kapën në 137 aksione të ndryshme të zhvilluara nga uniformat blu. Mes të prangosurve janë dhe 13 shtetas të shpallur në kërkim ndërkombëtar. Sipas policisë, gjatë muajit që lamë pas u ndërmorën 39 operacione për goditjen e kriminale në fushën e narkotikëve. Si rezultat I të cilëve u asgjesuan mijëra fidanë dhe bimë kanabisi si dhe u sekuestruan 1.2 kg kokainë, 11 300 tableta ekstazi, 45 000 euro dhe afro 300 mijë lekë të përfituara nga ky aktivitet i paligjshëm. Po ashtu u finalizuan dhe 14 aksione në fushën e armëmbajtjes pa leje. Si rrjedhojë e të cilave u sekuestruan 30 armë zjarri, 9 armë gjahu, municion luftarak, 2 mina me telekomandë, 44 granata, 47 ndëzësa granatash, 1 shënjestër optike dhe sende të tjera të kundërligjshme. Hetimet e krimit ekonomik dhe financiar nga ana tjetër çuan në zbulimin e një call ceneri që mashtronte shtetas të huaj në vende të ndryshme. Në pranga për këtë rast përfunduan 6 persona. Gjatë muajit gusht u zhvilluan dhe disa aksione për goditjen e krimeve mjedisore. Ndërkohë nga ana tjetër policia rrugore thotë se arrestoi 324 shoferë pasi u kapën në gjendje të dehur në timon si dhe pa leje drejtimi si dhe që pezulloi 516 leje drejtimi.