Mbi 700 mijë udhëtarë zgjodhën portin detar të Durrësit për të hyrë e për të dalë nga Shqipëria gjatë 9-mujorit të parë të këtij viti, ndërsa 243 anije tregtare kanë transportuar afro 2.7 milionë tonë mallra të ndryshme. Sipas Autoritetit Portual Durrës, ecuria në sektorin e udhëtarëve që zgjodhën transportin detar ka qenë pozitive. Sipas statistikave, u regjistruan 700,250 pasagjerë, ose 5% më shumë se e njëjta periudhë e vitit të shkuar. Në një vlerësim ekonomiko-financiar për periudhën janar-shtator 2023, aktiviteti portual vlerësohet të ketë pasur rritje në disa sektorë duke ndikuar në qendrueshmërinë ekonomiko-financiare të tij, me një rritje prej 6% më shumë të të ardhurave krahasuar me vitin 2022. Muaji shtator ka shënuar rritje të ndjeshme të të ardhurave, kjo si rezultat i rritjes së volumeve të përpunimit të konteinerëve, ndikim i cili është reflektuar dhe në totalin e periudhës 9 mujore. Terminali i konteinerëve ka patur ecurinë më pozitive, duke përpunuar 30% më shumë njësi konteinerike, ose 21 % më shumë mallra fizike se janar-shtatori i vitit të kaluar.