Samiti dy ditor i NATO-s në Ankara të Turqisë vendoi të ofrojë ndihmë ushtarake në vlerën e 70 miliardë eurove për Ukrainën. 32 vendet anëtare të aleancës ranë dakord të angazhohen gjatë vitit 2026 për pajisje dhe trajnim për Ukrainën, që përballet me agresionin rus prej vitit 2022. Po ashtu, nga samiti i NATO-së në Ankara, edhe presidenti amerikan, Donald Trump, njoftoi se Shtetet e Bashkuara do t'i japin Ukrainës licencën për prodhimin e raketave patriot. Trump zhvilloi një takim me presidentin ukrainas, Volodymyr Zelensky, ku në qendër të diskutimeve ishte forcimi i mbrojtjes ajrore të Ukrainës. Presidenti amerikan u shpreh optimist për ecurinë e përpjekjeve për t’i dhënë fund luftës në Ukrainë, duke thënë se javët e fundit është bërë përparim i rëndësishëm. “Kemi bërë shumë përparim gjatë javëve të fundit. Besoj se do të arrijnë një marrëveshje”, deklaroi presidenti Trump. Presidenti amerikan sinjalizoi gjithashtu se SHBA mund të blejë dronë të prodhuar nga Ukraina, duke vlerësuar zhvillimin e industrisë ushtarake ukrainase. Ai shtoi se Uashingtoni është i gatshëm të ofrojë garanci sigurie për Ukrainën në kuadër të një marrëveshjeje të ardhshme paqeje. Gjatë konferencës, presidenti Trump mbështeti edhe sulmet e Ukrainës në territorin rus, duke i cilësuar ato si një përshkallëzim që mund të ndihmojë në përfundimin e konfliktit. Ai shtoi se do të ishte i gatshëm të vizitonte Ukrainën “në momentin e duhur”.