Shtatë persona kanë mbetur të plagosur në dy aksidente rrugore të ndodhura brenda pak orësh në akset Gjirokastër–Tepelenë dhe Tepelenë–Memaliaj. Aksidenti më i rëndë u regjistrua rreth orës 17:10 në aksin Gjirokastër–Tepelenë, pranë kthesës së Viroit. Sipas të dhënave paraprake, një motomjet me targa greke, i drejtuar nga Jorland Koçi, është përplasur me një kamion me targa AB236YG, që drejtohej nga Edlir Kore. Dyshohet se drejtuesi i motomjetit ka hyrë në korsinë ku po qarkullonte kamioni. Si pasojë e përplasjes, ai ka mbetur i plagosur rëndë në këmbë dhe është transportuar me urgjencë në spital për të marrë ndihmën mjekësore. Grupi hetimor ka nisur veprimet procedurale për zbardhjen e plotë të rrethanave të aksidentit. Pak më vonë, një tjetër aksident u shënua në aksin Tepelenë–Memaliaj, pranë daljes së qytetit të Tepelenës. Një automjet tip Volkswagen me targa AA743KM, i drejtuar nga Dritan Bektashi dhe që lëvizte nga Gjirokastra në drejtim të Tepelenës, u përplas me një automjet Fiat me targa AB928KF, që udhëtonte në drejtimin e kundërt. Nga përplasja mbetën të plagosur pesë persona: drejtuesi i automjetit Volkswagen dhe katër shtetas të huaj që udhëtonin me automjetin Fiat. Të lënduarit janë transportuar në spital, ndërsa policia po heton shkaqet e aksidentit.