35 milionë euro fitim për vendin tonë është rezultati i koncertit të Kanye West në Tiranë, për të cilin qeveria akordoi mbi 4 milionë euro, sipas ministrit të Turizmit, Kulturës dhe Sporteve. Organizimi me sukses i eventit, tha Gonxhe, na ofron mundësi për të mirëpritur edhe këngëtarë të tjerë të njohur ndërkombëtarisht. “Efekti ekonomik është llogaritur nga disa referenca, kudo ka një sjellje të amatorëve, dashamirës të tyre që njihen për llojin e shpenzimeve. Është turi më i bukur botëror i këtij viti. Hotelet, shtëpitë ishin sold out. Ishin spektatorë të huaj që na dhanë një impuls shumë të madh ekonomik. Madje, kemi pasur rritje edhe të vizitave në monumente. 1000 vende pune me 1 mijë euro pagë. Kanë qenë mbi 300 trajlerë që kanë ardhur”, tha ministri Blendi Gonxhe. Në një konferencë për mediat, ministri komentoi dhe rënien e ritmit të rritjes së numrit të turistëve në qershor, duke i gjetur shkaqet te situata politike dhe protestat. “Ra me 1.3 për qind ulje krahasuar me qershorin e kaluar dhe kjo të mos ketë të paktën si indicie kryesore situatën politike. Nuk duam të hyjmë në hakun e protestës, por ky është fakti. A është e nevojshme të tendoset korda aq fortë, pse duhet që nga një pakicë e vogël të lejohet të shkojë në dhunë? Kjo përshkallëzohet kur policët duhet të mbrohen. Dhe ata që na shohin, thonë: para Shqipërisë, shkoj në Mal të Zi apo Greqi, kur nuk kam probleme me rendin apo sigurinë. Mos të harrojmë që patëm tentativa sulmi ndaj ekonomisë së mikpritjes, me sulmet e review. Del jashtë çdo logjike dhe çdo arsye”, tha ministri Blendi Gonxhe. Ministri quajti ekstremistë dhe radikalë një pjesë të protestuesve, duke i konsideruar shkaktarë të dëmtimit të ekonomisë së vendit. “Ç’të bëjmë ne që një pjesë e madhe e tyre nuk kanë votuar ndonjëherë. Ne nuk mund ta mendojmë Shqipërinë që të jetë në dorë të rastësisë. Janë 20 çupa dhe çuna dhe pastaj pas janë ata nxitësit që ju i keni dëgjuar vetë. Janë njerëzit e Arlindit, Agronit… Ai që thotë ‘bjerini’ është njëri që del në podcast, që thotë: do e marrin zvarrë kryeministrin dhe do e vrasin. A ka një kufi si mund të ndikojë shoqëria?”, tha ministri Blendi Gonxhe. Në daljen për mediat, Blendi Gonxhe njoftoi vendimin e Këshillit të Ministrave për të miratuar Strategjinë Kombëtare të Kulturës 2026–2030, që synon të forcojë rolin e kulturës, duke nisur nga rishikimi i plotë i kuadrit ligjor kulturor dhe i ligjit për artin dhe kulturën, modernizimin e normave dhe mbrojtjen e trashëgimisë, si dhe vendosjen e statusit të artistit si një kuadër ndërsektorial. Strategjia promovon turizmin kulturor që shkon përtej monumenteve.