Një ditë historike për politikën në SHBA, pasi ish-presidenti Donald Trump bëhet i pari në histori që akuzohet penalisht. Ish-presidenti u pa brenda gjykatës për herë të parë që nga njoftimi zyrtar i akuzave shoqëruar nga forca të shumta policore dhe shërbimi sekret. Përpara kamerave ai përshëndeti me grusht mbështetësit e tij, të cilët ndodheshin përpara gjykatës, ndërsa injoroi mediat. Më pas ai u drejtua për t’u përballur me gjyqtarin në seancën me dyer të mbyllura. Ish-presidenti u pa i ulur me ekipin e tij ligjor brenda sallës së gjyqit. Në gjykatën e Manhatanit atij iu paraqitën 34 vepra penale, duke përfshirë falsifikimin e të dhënave të biznesit dhe të dhënave financiare. Trump i mohoi të gjitha dhe u shpall i pafajshëm. Trump po përballet me akuzat që lidhen me pagesat e bëra gjatë fushatës presidenciale të vitit 2016 për të blerë heshtjen e një aktoreje të filmave pornografikë, me të cilën thuhej se kishte pasur një marrëdhënie jashtëmartesore. Ai akuzohet se nëpërmjet një skeme fiktive pagoi ish-avokatin e tij Michael Cohen, që t’i mbyllte gojën Daniels, ndërsa faturat i shënonte si shërbime ligjore. Kjo është akuza kryesore në çështjen ndaj tij, ndërsa dyshohet edhe se theu ligjet elektorale të Nju Jorkut. Në një ditë historike ai mbërriti në zyrën e prokurorit të qarkut të Manhattanit, ku kreu procedurat ligjore, mori shenjat e gishtërinjve e më pas u paraqit në gjykatë përpara prokurorëve. Para arrestimit Trump, i dërgoi një mesazh me anë të postës elektronike të gjithë ndjekësve të tij, të titulluar “E-maili im i fundit para arrestimit”. Ai u kërkoi përkrahësve ta ndihmojnë “në shpëtimin e Amerikës” duke bashkangjitur një link për mbledhje të fondeve presidenciale. Ish-presidenti republikan i ka quajtur akuzat “persekutim politik” dhe ka parashikuar se kjo do t’i dëmtojë demokratët në zgjedhjet e vitit 2024. Shtëpia e Bardhë reagoi në lidhje me çështjen. Përmes një deklarate për mediet, sekretarja e shtypit e Shtëpisë së Bardhë, Karine Jean-Pierre deklaroi se: “Presidenti do të përqendrohet te populli amerikan siç bën çdo ditë. Kjo nuk është diçka që është në fokus për të”. Përveçse gjyqi i parë ndaj një ish-presidenti, kjo është hera e parë që edhe një prokuror me ngjyrë, Alvin Bragg trajton një çështje të këtyre përmasave.