Shqipëria 113 vite e pavarur! Atmosfera kuqezi për Ditën e Flamurit u ndje në të gjithë vendin. Festa dhe entuziazmi vijuan përgjatë gjithë ditës, por edhe në mbrëmjen e 28 Nëntorit. Rrugët e kryeqytetit shqiptar u mbushën me qytetarë, por edhe shqiptarë të ardhur nga jashtë vendit, që iu bashkuan festës në atdhe. Atmosfera kuqezi u ndje në çdo cep të Tiranës, ku të rinjtë me flamujt kombëtarë festonin në rrugët dhe sheshet e kryeqytetit. Festa kuqezi vijoi edhe në Vlorë, me një spektakël dronësh në qiellin e qytetit bregdetar, që u ndoq nga afër nga qindra qytetarë. Atmosferës festive iu bashkuan jo vetëm vlonjatët, por edhe shumë qytetarë të ardhur nga trevat e tjera. Në qiell u shfaq shqiponja dykrenare, me mesazhin 113 vite pavarësi, shoqëruar me koncert festiv. Atmosfera e pavarësisë ndezi edhe Fierin, ku dhjetëra qytetarë me flamuj kuqezi parakaluan në qendër të qytetit. Të rinj e familjarë krijuan një atmosferë festive përgjatë bulevardit, ndërsa mbrëmja u mbyll me fishekzjarre që ndriçuan qiellin.