Gjermania është në mes të një periudhe politike të tensionuar, e cila ka marrë një kthesë të fortë pas protestave të fundit kundër bashkëpunimit të mundshëm mes CDU-së dhe AfD-së. Pas një mocioni të miratuar javën e kaluar në Bundestag për emigrantët, që përfshinte mbështetje nga të dyja partitë, lideri i CDU-së, Friedrich Merz, dha një mesazh të qartë të hënën në mbrëmje: “Ne nuk do të bashkëpunojmë me AfD-në, as para dhe as pas. Asnjëherë.” Ky deklarim i Merz, i mbajtur gjatë një kongresi të CDU-së në Berlin, u prit me ovacione të fuqishme nga delegatët. Ai theksoi se AfD-ja qëndron në kundërshtim me të gjitha arritjet që partia e tij ka bërë për Gjermaninë, duke përfshirë euron`, NATO-n dhe politikën e përgjithshme të shtetit gjerman. “Ne do të bëjmë gjithçka për ta bërë AfD-në sa më të vogël,” tha Merz, duke e konsideruar këtë forcë si një kërcënim për rendin demokratik të vendit. Kjo deklaratë erdhi pas një proteste masive në Berlin, ku rreth 250,000 njerëz dolën në rrugë për të kundërshtuar politikat e AfD-së dhe CDU-së. Aktivistët e majtë, të cilët janë të shqetësuar nga rritja e populizmit të ekstremit të djathtë, kërkuan një politikë të ndryshuar dhe më të moderuar. Në këtë klimë të tensionuar, Merz, i konsideruar si favorit siguroi se CDU do të luftonte për të fituar zgjedhjet federale të vitit 2025, dhe premtoi një rezultat të shkëlqyer që do të mbante larg populistët.