Policia franceze është alarmuar pas denoncimit se në Disneyland po zhvillohej një ceremoni martesore me një vajzë rreth nëntë vjeç. Parku për fëmijë jashtë Parisit ishte marrë me qira për një dasmë private, që mendohej të ishte e vërtetë, herët të shtunën në mëngjes, para orarit të hapjes për publikun. Por stafi dhe sigurimi i Disneyland thirrën policinë kur vunë re se e ashtuquajtura nuse, e veshur me fustan të bardhë, ishte shumë e re në moshë, sipas The Guardian. Pas hetimeve të policisë, zyra e prokurorit lokal tha se ngjarja nuk ishte një ceremoni martesore e vërtetë. “Ngjarja rezultoi të ishte e inskenuar, të ftuarit ishin të gjithë aktorë. Pra, nuk ishte një dasmë e mirëfilltë, por një inskenim i një dasme, e cila u filmua me rreth 100 figurantë. Ata kishin marrë me qira në mënyrë private Disneyland Paris duke pretenduar se ishte një dasmë reale,” tha zëvendësprokurori lokal. Katër persona u arrestuan nga policia. Dy prej tyre janë ende nën hetim të dielën, të dyshuar për mashtrim dhe pastrim parash. Ndër ta ishte një burrë që thuhet të ketë qenë dhëndri i rremë, i cili dyshohet se ka organizuar ngjarjen. Ai është 22 vjeç dhe mendohet të jetë britanik. Një grua 24-vjeçare nga Letonia gjithashtu po merrej në pyetje.