Një sasi e madhe kokaine është gjetur në brigjet e Katanias në Itali nga forcat vendase të Guardia di Finanzas. Lënda narkotike me peshë 2 tonë dhe një vlerë tregu prej 400 milionë eurosh ishte në mes të detit, e ambalazhuar në pako të mëdha të izoliara mirë për të mos lejuar depërtimin e ujit. Pakot ishin vendosur në një rrjete, ku kishte dhe mjete sinjalizuese, me shumë që të shiheshin nga personat të cilët duhet t`i merrnin aty. Skema e trafikantëve, në fakt, sipas autoriteteve të vendit fqinj, duket ka qenë pikërisht kjo: droga është hedhur nga një anije në det që të merrej nga kontrabandistë të tjerë të cilët do ta nxirrnin në breg. Pasi i tërhoqën pakot në tokë, efektivët zbuluan se kishte rreth 70 të tilla, me një peshë totalë të lëndës narkotike prej 2000 kilogramësh. Ky konsiderohet një nga konfiskimet më të mëdha të kokainës të bëra në vend dhe një goditje e fortë për organizatat kriminale, të cilat do të kishin fitime shumë të mëdha nëse droga do të arrinte të shitej në treg. Askush nuk është arrestuar deri tani për ngjarjen, ndërsa policia italiane ka nisur menjehere hetimet.