Qindra zjarrfikës në të gjithë Evropën Jugore luftuan të dielën me zjarret që detyruan mijëra njerëz të largoheshin nga shtëpitë e tyre dhe bënë që zyrtarët të ndalonin spektatorët të merrnin pjesë në një fazë të garës çikliste Tour de France, ndërsa temperaturat u rritën përsëri në rajonin e prekur nga vala e të nxehtit. Zjarret kanë shkatërruar më shumë se 19,000 hektarë tokë - një sipërfaqe më shumë se dyfishi i madhësisë së Manhattanit - në të gjithë Portugalinë, Spanjën, Francën dhe Greqinë, me temperatura që parashikohen të arrijnë 40 gradë Celsius në disa vende. Rreth 5,000 persona janw evakuuar nga shtëpitë e tyre pranë qytetit të Perpignan në Francën jugperëndimore, ndërsa zjarrfikësit përpiqeshin të kontrollonin flakët që kanë përfshirë 1,650 hektarë. Zyrtarët francezw njoftuan gjithashtu se faza e tretë e garës çikliste “Tour de France” të hënën nëpër Pirenej do të zhvillohej pa spektatorë. Në Greqi, flakët e shkaktuara nga një zjarr pyjor shkrumbuan dy fabrika në Selanik, duke i detyruar autoritetet të evakuojnë zonën përreth dhe të paralajmërojnë familjet të mbajnë dritaret e mbyllura. Një zjarr pranë bregdetit verilindor të Kosta Bravës në Spanjë dogji më shumë se 2,200 hektarë në dy ditë. Në Portugali, shërbimet e emergjencës thanë se kishin kontrolluar "80 përqind" të një zjarri që ka shkatërruar rreth 13,000 hektarë pyje dhe shkurre në veri të vendit. Rajonet në të gjithë Portugalinë, Spanjën dhe Francën jugore kanë rritur alarmet për nxehtësinë për ditët në vijim. Të hënën, vala e fundit e të nxehtit pritej të lëvizte drejt veriut, me parashikuesit që thanë se mund të zgjasë deri fundjavën e ardhshme. Pas një rritjeje dyjavore të temperaturave në qershor, Franca tha se kishte pasur më shumë se 2,000 vdekje shtesë se zakonisht në vetëm një javë, ndërsa Spanja dhe Belgjika raportuan secila më shumë se 1,000.