Policia e Shtetit ka ndaluar 18 persona, që morën pjesë në protestën kombëtare të Partisë Demokratike, mbrëmjen e kaluar në kryeqytet. Ndërkohë, 17 persona të tjerë janë proceduar në gjendje të lirë, ndërsa dy janë shpallur në kërkim. Policia njofton se ka nisur procedimin penale edhe ndaj tre deputetëve të Partisë Demokratike, Luciano Boçi, Klevis Balliu dhe Gazmend Bardhi, për veprën penale “Kundërshtimi i punonjësit të Policisë së Rendit Publik”. Sipas policisë, ndalimet janë kryer për shkak se protestuesit kanë përdorur lëndë djegëse, përfshirë molotovë, si dhe kanë kundërshtuar dhe goditur punonjësit e Policisë së Shtetit. Si pasojë e përplasjeve gjatë protestës para Kryeministrisë, janë lënduar 11 punonjës policie, të cilët ndodhen jashtë rrezikut për jetën.