Senatori i Nju Xhersit, Bob Menendez, është shpallur fajtor për 16 akuza të lidhura me një skemë ku ai merrte ryshfet, duke përfshirë shufra ari dhe një Mercedes-Benz, në këmbim të ndihmës së qeverive të huaja. Menendez, dikur kreu i Komitetit të fuqishëm të Senatit për Marrëdhëniet me Jashtë – tani përballet me perspektivën e dekadave në burg dhe përjashtimin e mundshëm nga partia Demokratike. Ai kishte pohuar se nuk ishte fajtor gjatë gjithë gjyqit tetë-javor, me avokatët e tij që argumentuan se dhuratat që ai pranoi nuk kualifikoheshin si ryshfet, sepse prokurorët nuk kishin arritur të provonin se ai ndërmori ndonjë veprim specifik si rezultat i marrjes së tyre. Gruaja e Menendez, gjithashtu përballet me akuza në rastin e ryshfetit, por gjyqi i saj u vonua në mënyrë që ajo t’i nënshtrohej trajtimit të kancerit të gjirit. Ajo është deklaruar e pafajshme, megjithwse avokatët e senatorit tw nju xhersit u përpoqën t’ia kalonin fajin zonjës Menendez. Një juri e dënoi Menendezin për të gjitha akuzat pas më shumë se 12 orësh diskutimi për tre ditë. Gjyqi zgjati nëntë javë. Gjatë gjyqit, prokurorët u mbështetën në dëshmitë e ekspertëve, emailet dhe mesazhet e Menendez për të treguar se senatori pranoi shpërblime të mëdha nga qeveritë e huaja. Ata thanë se dhuratat përfshinin shufra ari me vlerë mbi 100,000 dollarë. Menendez aktualisht po kandidon si i pavarur, duke shpresuar të mbajë vendin e tij në zgjedhjet e nëntorit, pasi shumica e demokratëve në shtet u larguan prej tij kur aktakuza që tregon shufra ari të fshehura në shtëpinë e tij u lëshua në fund të vitit të kaluar. Pamjet: AFP