Një mjek i kujdesit paliativ në Gjermani është dënuar me burgim të përjetshëm pasi u shpall fajtor për vrasjen e 15 pacientëve të tij, në një nga rastet më tronditëse që ka përfshirë sistemin shëndetësor gjerman vitet e fundit. Mjeku 41-vjeçar u shpall fajtor për vrasjen e 12 grave dhe 3 burrave gjatë periudhës nga viti 2021 deri në vitin 2024. Viktimat ishin nga mosha 25 deri në 94 vjeç. Edhe pse kishin probleme të rënda shëndetësore, hetimet zbuluan se shumica e tyre nuk ishin në prag të vdekjes. Mjeku punonte në fushën e kujdesit paliativ, një degë e mjekësisë që ka për qëllim të ndihmojë pacientët me sëmundje të rënda, duke lehtësuar dhimbjet dhe duke përmirësuar cilësinë e jetës së tyre. Kujdesi paliativ nuk synon vetëm trajtimin e simptomave fizike, por ofron gjithashtu mbështetje emocionale, psikologjike dhe sociale për pacientët dhe familjet e tyre. Por në këtë rast, sipas autoriteteve, një profesion që ka si qëllim lehtësimin e vuajtjeve është kthyer në një hetim për një nga krimet më të rënda në sistemin shëndetësor.