11 vendet të BE-së, mes të cilave Austria, Franca e Gjermania po kërkojnë reformimin e mënyrës së vendimmarrjes në politikën e jashtme të Bashkimit Evropian, duke propozuar kalimin nga unanimiteti në votimin me shumicë të kualifikuar. Në një letër drejtuar Përfaqësueses së Lartë të BE-së, Kaja Kallas, vendet në fjalë theksojnë se kultura e konsensusit është e rëndësishme për legjitimitetin e Unionit, por nuk duhet të përdoret për të penguar veprimin e përbashkët. “Duhet të sigurohemi që kjo kulturë konsensusi të nxisë veprimin e përbashkët në vend që ta parandalojë atë -përndryshe do të kemi legjitimitet, por jo forcë”, thuhet në letër. Sipas rregullave aktuale, vendimet në politikën e jashtme kërkojnë unanimitet, duke i dhënë çdo shteti anëtar mundësinë të bllokojë një vendim të mbështetur nga pjesa tjetër e BE-së. Ky mekanizëm është përdorur shpesh nga ish-kryeministri hungarez Viktor Orbán, i cili e shfrytëzoi veton për të kërkuar lëshime nga partnerët europianë. 11 vendet propozojnë aktivizimin e “klauzolës kalimtare” sipas Nenit 31, e cila do të mundësonte kalimin nga unanimiteti në shumicë të kualifikuar, rast pas rasti. Mbështetësit e reformës argumentojnë se ajo do të përshpejtonte vendimmarrjen dhe do të shmangte bllokimet, ndërsa kundërshtarët, veçanërisht disa shtete të vogla, druhen se do të humbnin një instrument të rëndësishëm për mbrojtjen e interesave të tyre. Megjithatë, reforma përballet me një paradoks: kalimi nga unanimiteti në shumicë të kualifikuar kërkon vetë unanimitet, duke u dhënë kundërshtarëve mundësinë ta bllokojnë atë. Gjermania dhe Franca kanë paraqitur gjithashtu një plan për forcimin e rolit të Kaja Kallas në politikën e jashtme të BE-së, duke e vendosur atë nën mbikëqyrjen e drejtpërdrejtë të presidentes së Komisionit Evropian, Ursula von der Leyen.