Një operacion i gjerë antidrogë është ndërmarrë nga Policia e Elbasanit në bashkëpunim me dy ekipe të Forcave të Ndërhyrjes së Shpejtë (FNSH), në orët e para të mëngjesit të kësaj të shtune nën drejtimin e Prokurorisë së Elbasanit. Aksioni u zhvillua paralelisht në Prrenjas, Librazhd dhe Elbasan duke vënë në pranga 10 persona. Burime zyrtare bëjnë me dije se u lëshuan 26 urdhër arreste, 10 persona u ndaluan mëngjesin e kësaj të shtune, 8 persona janë ndaluar më herët ndërsa 1 shpërndarës rezulton i mitur dhe do të ndiqet në gjendje të lirë. Në kuadër të këtij operacioni policia sekuestroi në cilësi të provës materiale 8 kg cannabis sativa, 100 gr kokainë dhe shuma parash të dyshuara të vëna nga aktiviteti i paligjshëm.Aksioni vjen në kuadër të operacioneve të mëhershme të koduara "Rrjeti" dhe "Tempulli". Hetimet nisën 10 muaj më parë me agjentë të infiltruar dhe dokumentuar me pamje filmike. Burime zyrtare bëjnë me dije se kontrollet janë të shumta dhe të përqendruara në objekte të dyshuara për aktivitet të paligjshëm në fushën e narkotikëve.