Në raportin vjetor të prezantuar sot në Komisionin e Ligjeve nga Prokurori i Përgjithshëm Olsian Çela, evidentohet një rritje e lehtë e kriminalitetit gjatë vitit 2025, por edhe një rritje e ndjeshme e efikasitetit në ndjekjen penale dhe përfaqësimin e çështjeve në gjykatë. Sipas të dhënave zyrtare, gjatë vitit 2025 janë trajtuar mbi 66 mijë materiale dhe janë regjistruar mbi 27 mijë procedime të reja penale, me një rritje krahasuar me një vit më parë. Të dhënat tregojnë se 76% e procedimeve i përkasin krimeve, ndërsa 24% kundërvajtjeve, ku peshën më të madhe e zënë veprat kundër rendit dhe sigurisë publike dhe vjedhja e pasurisë. Raporti thekson se mbi 42% e çështjeve janë dërguar për gjykim, ndërsa pjesa tjetër janë pushuar ose pezulluar. Gjykatat kanë dënuar mbi 10 mijë persona, me një rritje prej rreth 9% krahasuar me vitin e kaluar. Një vëmendje e veçantë i është kushtuar masave të sigurimit, ku në mbi gjysmën e rasteve janë kërkuar masa arresti, si dhe forcimit të hetimeve proaktive, veçanërisht në fushën e korrupsionit, krimit të organizuar dhe pastrimit të parave. Sipas raportit, vlera totale e aseteve të sekuestruara është diku tek 4 miliardë dhe 57 milionë lekë dhe ajo e sendeve të konfiskuara rreth 305 milionë lekë. Nëse do t’i përllogarisim në euro janë 43 milionë euro aseste të sekuestruar dhe diku te 3.2 milionë të konfiskuara. Në fokus mbetet edhe dhuna në familje, e cila ka shënuar rritje të lehtë të procedimeve, por me një nivel të lartë ndjekjeje penale, ku mbi 80% e rasteve janë dërguar për gjykim. Për vitin 2026, Prokuroria ka vendosur si prioritet forcimin e hetimeve për krimet kundër personit dhe pronës, luftën kundër korrupsionit dhe pastrimit të parave, rritjen e bashkëpunimit ndërinstitucional dhe ndërkombëtar, si dhe përmirësimin e efikasitetit dhe digjitalizimin e sistemit të drejtësisë.