Një vullkan në Etiopi ka shpërthyer për të parën herë në 10,000 vjet, duke lëshuar në qiell një shtëllungë aq të dendur tymi e hiri sa ka ndikuar dhe në udhëtimet ajrore mijëra kilometra larg në Indi. Vullkani i Hayli Gubbi, i cili ishte i fjetur prej kohësh, është gjallëruar papritur duke mbuluar me hi fshatrat fqinje. Edhe pse nuk ka raporte për viktima, shpërthimi përbën një kërcënim për komunitetin lokal të barinjve dhe për bagëtitë, pasi praktikisht i bën të papërdorshme kullotat jetike për to, sipas Associated Press. Banorët thanë se kishin dëgjuar një shpërthim të tmerrshëm në momentin e aktivizitmit të papritur të vullkanit. “Dukej sikur të ishte një bombë”, tha një prej tyre, Ahmed Abdela. Shpërthimi ka qenë i dukshëm edhe për satelitit; pamjet e NASA-s treguan re të dendura pluhuri që ngriheshin në qiell dhe lëviznin mbi Detin e Kuq. Reja vullkanike rezulton të jetë përhapur mbi Jemen, Oman dhe në Pakistan e Indi, sipas Qendrës Kërkimore në Tuluzë. Departamenti Meteorologjik i Pakistanit lëshoi një paralajmërim pasi hiri hyri në hapësirën ajrore të saj vonë të hënën. Në Indi, linja ajrore kombëtare Air India anuloi disa fluturime brenda vendit dhe jashtë kufijve, me qëllimin të kryhen sipas saj "kontrolle paraprake në ato avionë që kishin fluturuar mbi vende të caktuara gjeografike pas shpërthimit vullkanik të Hayli Gubbi".