Një xhiro për kënaqësi u kthye në një tragjedi për tre të miturit të cilët ecnin me skuter elektrike në bulevardin "Dëshmorët e Kombit" këtë të mërkurë. Një makinë i përplasi teksa kaluan rrugën kryesore me semafor të kuq, një prej tyre në gjendje të rëndë e dy të tjerët me dëmtime më të lehta në spital. Monopatet në Shqipëri janë kthyer nga një mjet trendy në një fenomen shqetësues për sigurinë rrugore, e sidomos për të miturit që përbëjnë kategori mjaft të gjerë si përdorues. Sipas statstikave deri në fund të 2024-shit, shifra e aksidenteve të tilla ishte 554, duke shënuar pothuajse dy aksidente të reja çdo ditë. Për vitin 2025, pa shifra absolut, thuhet se numri është rritur me gati 30%, duke kontribuar në 51 aksidente të përditshme, përfshirë të gjitha kategoritë e mjeteve rrugore. Aksidentet sjellin trauma të kokës, lëndime në gjunjë, bërryl dhe shpinë, e fatkeqësisht nuk mungojnë as rastet fatale apo edhe invalidizim afatgjatë. Në ligjin shqiptar skuterat elektrikë trajtohen si “motomjete” sipas Kodit Rrugor. Megjithatë nuk përfshin rregulla të veçanta për skuterat si moshë minimale, certifikim ose patentë specifike. Prej kohësh nga ekspertë kërkohet ligj i veçantë për skutera elektrikë, me kërkesa për moshë minimale. Ajo që duhet më shumë është sensibilizim kombëtar dhe kontrolle të rregullta e monitorim sistematik nga Policia Rrugore. Si të mbrojmë të miturit nga rreziku që sjell përdorimi i pakujdesshëm i këtyre mjeteve? Cfarë duhet të ketë legjislacioni shqiptar?