Viti 2023 rezulton një nga vitet me më shumë aktivitet politik për ish-kryeministrin Sali Berisha, me fitore e humbje, me humbje që lexohen fitore, apo me fitore që në realitet janë humbje, e në fund një fitore numerike e zhbërë nga Struktura e Posaçme Kundër Korrupsionit dhe Krimit të Organizuar. Me një parti të përçarë, e një vulë nëpër gjykata, Berisha mbajti një premtim që për shumëkënd u konsiderua I gabuar në kushtet kur kërkohej bashkimi i demokratëve. Ish-kryeministri premtoi se heqja e fuqisë nga duart e kryetarit për të caktuar përfaqësuesit e demokratëve në zgjedhje nëpërmjet primareve do të ishte kthim I pushtetit tek vota e demokratëve. Në të tillë situate, Berisha përgatiti primaret brenda partisë, e ndërkohë nisën negociatat mes Edi Palokës dhe Gazment Bardhit, që të mund të bëhej bashkimi në zgjedhje me një kandidat. Por përballë kësaj përpjekje, demokratët nëpërmjet Gazment Bardhit, do të kërkonin një lloj heqje dorë nga primaret, pasi sipas tyre, kushdo që do të garonte përballë përfaqësuesve të Rithemelimit, do ta kishte të pamundur garën e barabartë. Kërkesa për të hequr dorë nga primaret nëpërmjet një rimodelimi të tyre nuk do të pranohej nga Berisha, e nga ana tjetër Bardhi do të fajësonte grupin e këtij të fundit për dështimin e negociatave, pasi sipas tij I kishin vënë kusht njohjen e Statutit të 11 dhjetorit. Në të tilla kushte demokratët do të shkonin të përçarë në zgjedhje.