Sali Berisha duhej të niste sot maratonën e gjykimit në GJKKO për dosjen “Partizani”. Prokurori i SPAK, Arben Kraja, mbylli hetimet dhe dërgoi në gjyq, kreun e Partisë Demokratike dhe dhëndrin e tij, Jamarbër Malltezin. Ish-kryeministri i vendit nuk u paraqit para trupës gjykuese, pasi pretendon se nuk është lajmëruar. Fletëthirrja e GJKKO është dorëzuar ditën e premte dhe është pranuar nga Malltezi, por ky i fundit dhe pala mbrojtëse e Berishës argumentuan se nuk ishin njoftuar në kohë. Në kushte të tilla, prokurori Kraja kërkoi shtyrjen e seancës e cila do të mbahet më 21 korrik. Para seancës, në media doli lajmi se gjyqtarja Elsa Ulliri kishte paraqitur dorëheqjen nga gjykimi, pasi kishte konflikt interesi duke qenë kushërirë e deputetes së Partisë Demokratike, Andia Ulliri. Avokati i Berishës, Genc Gjokutaj e hodhi poshtë diçka të tillë. GJKKO me një komunikim zyrtar për mediat shpjegon se do të japë sqarimin e situatës më 21 korrik, nëse ka pasur dorëheqje të Ullirit, apo jo. Berisha nuk është e vetmja figurë e lartë e PD që duhej të vizitonte së fundmi organet e drejtësisë. Flamur Noka po ashtu u paraqit në ambientet e SPAK ditën e premte.