Hapja e shkollave është dilemë, jo vetëm e vendit tonë, por e gjithë botës. Brenda kësaj jave pritet të mblidhet Komiteti i Ekspertëve, me praninë e zyrtarëve të ISHP-së dhe atyre të Ministrisë së Arsimit, që do të vendosin, se çfarë do të bëhet më 14 shtator, a do të nisë në shkollë apo online, mësimi? “Shpresojmë shumë të shkojmë fizikisht në shkollë. Në online nuk mësuam gjë. Dilje nga Zoom-i, thoshe nuk kam internet, kopjoje nëpër provime. Më mungojnë shokët, mësuesja. E kisha vajzën me 10-ta. Vitin që u mbyll nuk mësoi asgjë. Jo tërmeti, jo Viti i Ri, jo mësimi online. Asgjë nuk kuptuan. Mezi presim të na shkojnë në shkollë. Nuk e di, si do bëjnë klasat e para, apo ata që shkojnë në vit të parë. Mësuesi ka nevojë ta psikologjisë nxënësin. Fëmijët duhet të jenë bashkë, të mbyllur po na stresohen”, shprehen disa prindër dhe fëmijë.